ITArmenia.NET » Ինտերնետ

Facebook-ի 45000 օգտատերեր դարձել են Ramnit վիրուսային ծրագրի զոհ

AMzone — Sat, 07 Jan 2012 10:26:45 +0000

Seculert-ը հաղորդում է, որ Facebook-ում գտնվող վիրուսային ծրագիրն ուղղված է եղել սոցիալական կայքի Մեծ Բրիտանիայի, Ֆրանսիայի և աշխարհի այլ երկրների հաշիվների մուտքաբառերի և գաղտնաբառերի դեմ:

Mashable Social Media-ն հաղորդում է, որ ընդհանուր առմամբ՝ 45000 հաշիվներ են վնասվել:

Microsoft–ը նշում է, որ Ramnit-ը վարակում է Windows-ը` վնասելով HTML ֆայլերը:

Աղբյուր: 1in.am

«Հալալ ինտերնետ»՝ ինտերնետի փոխարեն. Իրանը հրաժարվում է համաշխարհային ցանցից

AMzone — Wed, 04 Jan 2012 14:16:19 +0000

Մոտ ժամանակներս Իրանն ամբողջությամբ «կխզի կապը» համաշխարհային ցանցի՝ ինտերնետի հետ և սեփական փակ ցանցն, այսպես կոչված ազգային ինտերնետը կգործարկի:

Ինչպես հաղորդում է ադրբեջանական «ԱՊԱ» գործակալությունը, այս մասին հայտարարել է Իրանի անվտանգության և տեղեկատվության կազմակերպության պաշտոնական ներկայացուցիչ Պիյամ Քյարբասին: Նա հավելել է, որ Իրանում «գործելու է ազգային ներքին ինտերնետը, որից քաղաքացիները կարող են օգտվել երկրի ներսում»: Իրանն այդպիսով ամբողջությամբ հրաժարվելու է համաշխարհային «սարդոստայնից» և իր օգտատերերին ողջ աշխարհից մեկուսացած, սեփական ներքին ցանցն է առաջարկելու: Ինտերնետի արագությունը վայրկյանում 2 մեգաբայթ է կազմելու:

Ներքին ցանցը երկու շաբաթ անց արդեն պատրաստ է լինելու շահագործման:

Այն, որ Իրանը պատրաստվում է ազգային ինտերնետ ստեղծել, ամիսներ առաջ հաղորդել էր ամերիկյան The Wall Street Journal պարբերականը: Պարբերականը գրել էր, որ վերոնշյալ քայլն իրականացվում է Իրանի իշխանությունների կողմից սպառնալիք համարվող մի շարք երևույթների` արևմտյան գաղափարների, մշակույթի և ազդեցության, առաջին հերթին՝ ԱՄՆ-ի «վիրտուալ ներխուժման» դեմ պայքարի շրջանակում: Հաղորդվում էր, որ իրանական ազգային ցանցը «Հալալ» է կոչվելու՝«մուսուլմանի էթնիկ և բարոյական նորմերին» համապատասխան ցանց:

Նշենք, որ ներկայում «փակ ցանց» գործում է նաև Կուբայում. այդ երկրում գրեթե երկու ինտերնետ է առկա. դրանցից մեկը, որը միացված է համաշխարհային ցանցին, նախատեսված է զբոսաշրջիկների և կառավարության պաշտոնյաների համար, իսկ մյուսը փակ է և վերահսկելի` սահմանափակ մատչմամբ, և նախատեսված է լայն զանգվածների համար:

Համաշխարհային ինտերնետի սեփական օրինակը ցանկանում է ստեղծել նաև Հյուսիսային Կորեան:

Աղբյուր: Tert.am

Վերջին 7 օրվա ընթացքում, ադրբեջանցի հակերները կոտրել են 7-ից ավելի հայկական կայք

AMzone — Mon, 02 Jan 2012 14:35:37 +0000

Նախատոնական եւ տոնական օրերին, ադրբեջանցի հակերները կոտրել են 7-ից ավելի հայկական կայք:

Դրանց մի մասը արդեն իսկ վերականգնված է, իսկ մնացածի վրա դեռ առկա է, ադրբեջանցի հակերների կողմից թողնված գրությունները:

http://sole.am

http://Hr.am

http://Recruiter.am

http://An-archiline.com

http://Areghotel.com

http://Axsio.net

http://Jam-anc.com

http://kayfot.info

2011-ին Հայաստանում սոցիալական ցանցերի առաջատարը շարունակեց մնալ Odnoklassniki ցանցը

AMzone — Tue, 27 Dec 2011 17:23:19 +0000

Ողջ աշխարհում 800 միլիոն օգտագործող ունեցող Facebook սոցիալական ցանցում Հայաստանից կա ընդամենը 242 000 օգտագործող: Սա 2011-ի վերջին տվյալներն են ըստ socialbakers.com վիճակագրական ընկերության: Այս ցուցանիշը շատ փոքր է՝ համեմատած ռուսական Odnoklassniki սոցիալական ցանցի 640 000 հայ օգտագործողների հետ (Liveinternet-ի տվյալներով): Odnoklassniki-ն շարունակում է մնալ ամենաճանաչվածը Հայաստանում, սակայն միևնույն ժամանակ, ամենապասիվը՝ հասարակական ակտիվության տեսանկյունից:

Եթե ընդհանուր առմամբ դիտարկենք 2011-ին ճանաչված սոցիալական ցանցերի զարգացման ընթացքը Հայաստանում, ապա կնկատենք, որ յուրաքանչյուրն ունի հստակ թիրախավորված լսարան:

Ըստ տեղեկատվական տեխնոլոգիաների փորձագետ Սամվել Մարտիրոսյանի, Odnoklassniki-ում մարդիկ հիմնականում գրանցվում են անձնական շփման համար. «Կայքն իր կառուցվածքով և գործիքներով հենց այդպիսինն է: Այն ավելի շատ զրույցների համար է և խմբային էֆեկտ չի տալիս: Իսկ Facebook-ն ավելի սոցիալականացված է: Ունի գործիքներ, որոնք նպաստում են հասարակական ակտիվությանը և հարմար են ակտիվիստների համար»:

Բացի Odnoklassniki-ից և Facebook-ից Հայաստանում քիչ թե շատ տարածված են նաև Vkontakte և հայկական HayLand սոցիալական ցանցերը: Սամվել Մարտիրոսյանի խոսքով, Vkontakte-ն Հայաստանում ակտիվ չէ՝ ի տարբերություն Ռուսաստանի: Նրա կարծիքով, հիմնական օգտագործողներն այցելում են ֆիլմեր դիտելու և երաժշություն ներբեռնելու նպատակով: «Դե իսկ HayLand-ն էլ ունի իր ստաբիլ լսարանը, որը դեռ կարողանում է դիմադրել մեծ սոցիալական ցանցերին»,-ասաց Սամվել Մարտիրոսյանը:

Վերջերս HayLand-ի ղեկավար Արտաշես Մկրտչյանը նշեց, որ ցանցում կա 135 000 օգտագործող, որոնցից ակտիվ են 75 000-ը: Իսկ Vkontakte-ի վիճակագրությունը ցույց է տալիս Հայաստանից 322 000 օգտագործող:

Խոսելով սոցիալական ցանցերի մասին, հարկ է մեկնաբանել նաև 2011-ի բում համարվող Google+ սոցիալական ցանցը, որը գործարկումից հետո մի քանի ամսում ձեռք է բերել 40 միլիոն օգտագործող: Ի սկզբանե բոլորը սկսեցին դիտարկել այն որպես Facebook-ի մրցակից: Սակայն դեռ վաղ է այս մասին խոսել, այն էլ Հայաստանում: Google+-ում հայ օգտագործողների քանակի մասին որևէ վիճակագրություն չկա: Ըստ Սամվել Մարտիրոսյանի, Google+-ը դեռ «հում է» և բոլորն այն պահում են որպես «ավանդ, ձեռքի հետ». «Կարծում եմ դրա ազգդեցությունն ավելի թույլ է Հայաստանում, քան Twitter-ինը, որը կրկին շատ փոքր և աննշան ազդեցություն ունի Հայասատանում»:

Աշխարհում հեղափոխությունների հեղինակ Twitter միկրոբլոգային ցանցը Հայաստանում ունի մոտ 1000 ակտիվ օգտագործող: Սամվել Մարտիրոսյանի կարծիքով, Twitter-ում շատերը գրանցվում են, սակայն ոչ մի գրառում չեն անում:

Դե իսկ Հայաստանում սոցիալական ցանցերի դաշտում «Տարվա հայտնություն» անվանակարգը կարելի է շնորհել Foursquare-ին՝ աշխարհում գեոլոկացիոն սոցիալական ցանցերի առաջատարին: Foursquare-յան «նորաձևությունը» Հայաստանում սկսեց տարածվել «ԲարՔեմփ 2011-ից» հետո: 15 միլիոն օգտագործող ունեցող այս ցանցում հայ օգտագործողները աննշան մասնիկ են կազմում՝ ըստ «աչքաչափի», քանի որ չկա որևէ վիճակագրություն, այստեղ կա 1000-ից ավելի հայ օգտագործող, որից ակտիվ են մոտ 600-ը և հավանաբար վերջիններս հայկական համացանցի ակտիվիստներն են:

Հայաստանում 2011-ին արագորեն աճեց ինտերնետ հասանելիությունը: Դա պայմանավորված է ինտերնետի և համակարգիչների՝ գնալով ավելի մատչելի դարձող գներով: Գալիք 2012-ին էլ ավելի շատ մարդիկ կունենան համակարգիչ ու ինտերնետ և սկսնակ օգտագործողների առաջին քայլերից մեկը կլինի որևէ սոցիալական ցանցում գրանցվելը: Օրեցօր ավելանում է նաև սմարթֆոն օգտագործողների թիվը:

2012-ին ակնկալվում է նշված բոլոր սոցիալական ցանցերում հայ օգտագործողների աճի կրկնապատկում, դե իսկ Facebook-ում հասարակական ակտիվությունը օրեցօր կաճի, քանի որ առջևում խորհրդարանական ընտրություններն են:

Աղբյուր: PanARMENIAN.Net

Թուրք հաքերները մոտ 100 կայք են ջարդել Ֆրանսիայում

AMzone — Tue, 27 Dec 2011 16:34:15 +0000

Հայկական սփյուռքի կողմից Ֆրանսիայում հիմնված մոտ 100 ինտերնետային կայքեր դարձել են թուրք հաքերների զոհը, Հայոց ցեղասպանության ժխտումը քրեականացնող օրինագծի հեղինակ, պատգամավոր Վալերի Բուայեի կայքը ջարդելուց հետո: Այդ մասին հաղորդում է մասնագիտացած թուրքական կայքը, գրում է Nouvelles d`Arménie–ին` վկայակոչելով AFP–ն:

Մի խումբ հաքերներ իրենց վրա են վերցրել դեկտեմբերի 26-ին Ֆրանսիայում մոտ հարյուր կայքեր ջարդելու պատասխանատվությունը` կապված Ֆրանսիայում հայերի գործունեության, ինչպես նաեւ քաղաքական գործիչների, այդ թվում Ազգային շարժման համար միությունից Բերնար Դեպերի հետ:

Նշենք, որ Ֆրանսիայի Ազգային Ժողովն իր դեկտեմբերի 22-ի նիստում, ընդունեց Հայոց ցեղասպանության ժխտումը քրեականացնող օրինագիծը: Օրենքը, ցեղասպանության փաստը ժխտելու դեպքում, նախատեսում է 1 տարվա ազատազրկում եւ 45 հազար եվրո տուգանք: Դեկտեմբերի 7-ին այս օրինագիծն ընդգրկվել էր Ֆրանսիայի ԱԺ իրավական հարցերի հանձնաժողովի օրակարգ:

Հիշեցնենք, որ Թուրքիան նախքան քվեարկությունը, Ֆրանսիային սպառնում էր լուրջ հետեւանքներով, ընդհուպ մինչեւ Փարիզում Թուրքիայի դեսպանի հետկանչը եւ առեւտրային հարաբերությունների խզումը:

Աղբյուր: NEWS.am

Orange Բլոգ. նոր սերնդի վեբ միջավայր հայ բլոգերների համար

AMzone — Mon, 26 Dec 2011 10:38:24 +0000

Այսօր Orange-ը ներկայացրեց Orange Բլոգը` վեբ միջավայր, որտեղ յուրաքանչյուրը կարող է ստեղծել իր սեփական “տարածքը” և հավաքել իր բոլոր հիշարժան պահերը նկարների, վիդեո նկարահանումների, աուդիո ֆայլերի կամ գրառումների տեսքով և կիսվել դրանցով մտերիմների հետ: Orange Բլոգն Orange-ի այն բացառիկ ծառայություններից է, որից կարող են օգտվել ոչ միայն Orange-ի բաժանորդները, այլ նաև բոլոր նրանք, ովքեր ունեն ինտերնետի մուտքի հնարավորություն:

«Սա պրեմիերա է ինչպես Հայաստանում, այնպես էլ Orange-ի աշխարհագրության երկրներում. նման պլատֆորմ դեռ մեր գործընկերներից ոչ մեկը չի առաջարկել: Այն արտահայտում է Orange-ի ցանկությունը` հայաստանյան ինտերնետային օգտատերերին տրամադրել հայերեն լեզվով պարզ ու հասկանալի բլոգային պլատֆորմ: Լինելով շարժական ինտերների առաջատարը երկրում և տեսնելով հայկական բլոգոսֆերայում տիրող աշխուժությունը` մենք ցանկանում ենք աջակցել ու խթանել հայերեն լեզվով էլեկտրոնային բովանդակության զարգացմանն ու տարածմանը», ասաց Orange Արմենիայի գլխավոր տնօրեն Բրունո Դյութուան:

Orange Բլոգը նոր սերնդի բլոգային պլատֆորմ է, որն իր անդամներին տալիս է օգտագործման անհավատալի ազատություն ու հարմարավետություն: Բլոգում կարելի է գրանցվել ինչպես http://orangeblog.am կայքում, այնպես էլ պարզապես Orange համարից ուղարկելով կարճ հաղորդագրություն 2564 համարին` բովանդակության մասում նշելով OK, միջակայք, էլ. փոստի հասցե, ինչպես օրինակ` «OK contact-centre@orangearmenia.am»:

Orange-ի բաժանորդները Orange Բլոգից օգտվելիս կունենան հատուկ առավելություններ: Նրանք կարող են իրենց պրոֆիլը միացնել բջջային հեռախոսահամարին և բոլոր ծանուցումներն անվճար կերպով ստանալ անմիջապես հեռախոսին` կարճ հաղորդագրության տեսքով: Orange-ի բաժանորդները կարող են նաև 2564 համարին ուղարկված անվճար կարճ հաղորդագրությունների միջոցով “թարմացնել կարգավիճակը”, թողել մեկնաբանություններ կամ գրել պատասխաններ: Ավելին, կարելի է նաև լուսանկարներ կամ տեսանյութեր վերբեռնել բլոգ անվճար MMS-ի միջոցով: Պետք է պարզապես 2564 կարճ համարին ուղարկել MMS` կցելով նկարը կամ տեսանյութը:

Orange Բլոգը հնարավորություն է տալիս իր Orange-ի բաժանորդ օգտատերերին տեղադրել մինչև 2 գիգաբայթ ընդհանուր ծավալով լուսանկարներ, տեսանյութեր, տեքստային գրառումներ կամ այլ բովանդակություն, որը ոչ-Orange բաժանորդների դեպքում կկազմի 100 մեգաբայթ:

Ավելին իմանալու համար`

http://orangearmenia.am/orange-blog/
http://www.orangeblog.am/

«Anonymous» հաքերները կոտրել են «ստվերային ԿՀՎ»-ի կայքը

AMzone — Sun, 25 Dec 2011 21:36:30 +0000

«Anonymous» հաքերներն իրենք իրենց տոնական նվեր են մատուցել` կոտրելով աշխարհահռչակ «Stratfor» վերլուծական ընկերության կայքը: Աշխարհում տեղի ունեցող իրադարձութունների մասին տեղեկությունների հավաքագրմամբ եւ հետազոտությամբ զբաղվող ընկերության ծառայությունից օգտվում են ԱՄՆ բանակը, ներդրումային «Goldman Sachs» ընկերությունը: «Stratfor»-ը նաեւ անվանում են «ստվերային ԿՀՎ»:

Հաքերները «Stratfor»-ի սերվերը ջարդելու մասին հայտարարել են Twitter-ի իրենց միկրոբլոգում` նշելով, թե հաջողվել է գողանալ մոտ 200 գիգաբայթ տեղեկատվություն, այդ թվում` աշխատակիցների գրագրություններն իրենց սպառողների հետ, անձնական տվյալներ, նաեւ բանկային քարտերի համարներ: «Anonymous»-ը հայտարարել է, որ դրանում մեղավոր են «Stratfor»-ի ծրագրավորողները, ովքեր նեղություն չեն կրել ծածկագրել անձնական տվյալները:

«LulzXmas-ը միայն սկսվում է: Մնացեք մեզ հետ, զվարճությունը երաշխավորված է, հակառակ դեպքում մենք ձեզ կվերադարձնենք ձեր փողերը»,-խոստացել են հաքերները:

Նշենք, որ «ստվերային ԿՀՎ»-ի տուժած հաճախորդներից մեկն էլ ԱՄՆ ներքին անվտանգության վարչության աշխատկիցներից մեկն է եղել, ում անձնական տվյալները հրապարկվել են համացանցում եւ նա զրկվել է իր բանկային քարտի վրա եղած գումարից: «Ինչո՞ւ ես: Ես հարուստ չեմ»,-բողոքել է նա լրագրողներին:

Աղբյուր: NEWS.am

Կինոպրոդյուսերները պահանջում են Vkontakte-ին ջնջել «պիրատային» բովանդակությունը

AMzone — Sun, 25 Dec 2011 16:37:25 +0000

Հեռուստա- և կինոպրոդյուսերների ասոցիացիան նամակ է ուղարկել է ռուսական Vkontakte սոցիալական ցանցի ադմինիստրացիային, որով պահանջում է ցանցից ջնջել ավելի քան 500 ֆիլմ։ Այս մասին գրում է Ria.ru-ն։

Vkontakte-ի մամլո քարտուղար Վլադիսլավ Ցիպլուխինի խոսքով, ցանցի ադմինիստրացիան ուղարկել է իր պատասխանը ասոցիացիային։ Մասնավորապես, առաջարկվել է ինքնուրույն զբաղվել պիրատային բովանդակության վերացմամբ։

«Մենք նաև առաջարկել ենք ասոցիացիային ուղարկել մեզ այն տեսանյութերի հղումները, որոնք խախտում են հեղինակային իրավունքը, որպեսզի մենք կարողանանք ջնջել պիրատային բովանդակությունը»,-նշել է Վլադիսլավ Ցիպլուխինը։

Vkontakte այս նամակին պատասխան դեռևս չի ստացել։ Առաջին անգամ չէ, որ սոցիալական ցանցը բախվում է նման խնդիրների հետ։ Vkontakte-ն ռուսական համացանցում համարվում է ամենաառաջատար սոցիալական ցանցը՝ 30 միլիոն օգտագործողով։

Աղբյուր: PanARMENIAN.Net

Google-ը շարունակում է համագործակցել Firefox–ի հետ 900 միլիոն դոլարով

AMzone — Sun, 25 Dec 2011 16:34:38 +0000

Google-ի պայմանագիրը Mozilla Foundation ընկերության հետ` Firefox հայտնի բրաուզերում փնտրող համակարգ ներբեռնելու վերաբերյալ, ինտերնետ հսկայի համար կարժենա 900 միլիոն դոլար:

Պայմանագրի համաձայն, Google-ը Firefox–ում փնտրող համակարգ կդառնա եւս երեք տարի, իսկ ռեկորդային գումարը բացատրվում է նրանով, որ ինտերնետային հսկայի գլխավոր հակառակորդը Microsoft-ն է եղել, որն առաջ է քաշում իր փնտրող համակարգը` Bing-ը: Բանակցություններին մասնակցել է նաեւ Yahoo-ն, բայց գործարքը չափազանց թանկ էր նրա համար: Պայմանագրի պայմանները բացահայտել է AllThingsD հրատարակչությունը:

Աղբյուր: NEWS.am

Twitter սոցիալական կայքում արդեն թույլատրվում է անհանգստացնել մարդկանց

AMzone — Fri, 16 Dec 2011 20:50:14 +0000

ԱՄՆ դաշնային դատավորն այսօր ասել է, որ համացանցային դարում հարկավոր է կարողանալ ինչ-որ բաներ անտեսել:

Forbes-ը հայտնում է, որ 2008–2010 թվականներն ընկած ժամանակահատվածում Ուիլյամ Լոուրենս Քեսիդի անունով մի մարդ Twitter սոցիալական կայքի միջոցով 8000 հաղորդագրություն է ուղարկել բուդդայական առաջնորդ Ալիս Զեոլիին` դատապարտելով նրա հայացքները, բուդդիզմը, և առաջարկելով նրան ինքնասպանություն գործել: Ամեն անգամ Զեոլին արգելափակել է նրա ուղերձները, բայց Քասիդին նոր էջեր է բացել կայքում և շարունակել անհանգստացնել նրան: 2010 թվականին Քասիդին մեղադրվել էր Զեոլիին անհանգստացնելու և նրան «զգացմունքային տառապանք» պատճառելու մեջ:

Բայց հինգշաբթի օրը ԱՄՆ դաշնային դատավորն անմեղ է ճանաչել Քասիդիին` հայտնելով, որ դա նրա ազատ խոսքի իրավունքն էր: Դատավոր Թիթուսը նաև հայտնել է, որ Զեոլին, կրոնական առաջնորդ լինելով, պետք է կարողանար անտեսել մեղադրյալի անհանգստացնող հաղորդագրություններն ու թվիթները և անգամ չպետք է արգելափակեր դրանք:

Աղբյուր: 1in.am